Won i Schuelbueb bi gsy, han i mit Blasmusig aagfange. U i de Musiggsellschafte Boltige, Konolfinge u Untersseen (dert o i der Schillermusig) gspilt. Us bruefleche Gründ han i d Blasmusig verla u mi em Schwyzerörgeli zuegwändet.

Uf däm Instrumänt spilen i syt rund vierzg Jahr. Während all dere Zyt han i o ds einte oder andere Stückli komponiert. Ufgschribe han ig se aber ersch i de letschte Jahr. Aber o nume no die, won i denn no gspilt ha. Die räschtleche Kompositione sy im musikalische Irgendwo glandet. E Bemerkig no zum «Bäsebinder». We alli andere Tänzli uf dere Syte ohni z frage dörfe gspilt wärde, isch der «Bäsebinder» nid frei ggä. We dä öpper wetti spile, müessti me zersch der Jörg Ringgenberg um d Ywilligung frage. Das Stück het sy Grossvatter gschribe u Jörg hets orcheschtriert. Für d Blasmusig. I ha drus es Stück für ne volkstümlechi Formation gmacht.