Büecher
Nach de «Adväntsgschichte», wo nid nume i Buechform erschine sy, sondern o uf der SRF Musigwälle sy usgstrahlt worde, isch grad nüüt Nöis planet.
Härzlech willkomme!
Härzlech willkomme uf myre Websyte! Si isch gmacht für drüber, aber o für driyne z luege.
We der obe uf d Pünkt klicket, de erfahret er Züg u Sache über mii u chöit läse, was es Nöis git u was i scho lenger einisch gschribe ha.
Vil Gwundervergnüege!
U hie no eine vo myne Lieblingssprüch:
Wen e Mönsch paar Fähler het,
zell ne nid grad zu de Schlächte.
Weisch, am beschte Öpfelboum
git es öppe Miesch u Flächte.
Ernst Balzli
Nöis us em Bletterwald
Theater
Der Elgg-Verlag het mys nöischte Theaterstück, «Lochlinge» ufgno. Es wird i nes paar Wuche dert z ha sy. Wyteri Informatione de später under «Theater».
«Nach der Party» isch es Zwöipersonestück, wo letscht Jahr am Volkstheaterfestival z Meiringe isch ufgfüehrt worde. Uf Hochdütsch. Mii hets denn ddünkt, dass me das Stück o i Mundart sötti chönne spile. D Angelika Waldis, d Outorin, het mer erloubt «Nach der Party» i ds Bärndütsch z übertrage. U der Elgg-Verlag wirds ufnäh. Es geit zwar no ne Momänt, es isch aber uf guete Wäge.
Für ds 750 Jahr Jubiläum z Habkere han i dörfe es Freiliechttheater schrybe. «Ds Jahr ohni Summer» heissts u wird im Summer 2025 z Habkere, hinde im Blossmoos, ufgfüehrt. Tickets sy under www.freilichttheater-habkern.ch z ha. D Habker Theaterlüt, aber o di beteiligte Vereine sy scho dranne un i bi gspannt, wie si myner Ideene wärde umsetze. Es git uf all Fäll ganz e schöni Gschicht. Vo dere wird me z Habkere sicher no lang rede.
Musig
I bi geng öppe e chli dranne. Für ds Komponiere bruchen i d Luune derzue. Drum gits de vilich wider einisch öppis Nöis. Es chunnt wies chunnt.