Büecher

Nach de «Adväntsgschichte», wo nid nume i Buechform erschine sy, sondern o uf der SRF Musigwälle sy usgstrahlt worde, isch grad nüüt Nöis planet.

Theater

Der Elgg-Verlag het ds füfzähte Theaterstück vo mir i sy Verlag ufgno. Es heisst „Gstürm im Spyswage“. D Fahrt füehrt dür ds Land (d Reisestrecki isch nid genau vorggä) u ds Stück zeigt, wär sech imene Spyswage so alls trifft. Alti, Jungi, Lüt wo motze, sech ergere oder o schüch sy. Wil der Zug – us technische Gründ – e chli Verspätig het, chunnts zu turbuläntere Szene. U wo du der Spyswage no im Tunnel blybt stecke …

Ds vierzähte Theaterstück, „Lochlinge“, han ig hie scho churz erwähnt gha. Es zeigt e Gmeindspresidänt, wo meint alls chönne dürezboxe, was är im Gring het. Dass ihm derby Lüt im Wäg sy, negiert er zimlech. U dass wäge der Energiegwinnig es ganzes Dorf söll gfluetet u derfür Dorfbewohner sölle umgsidlet wärde, isch für ihn kes Problem. Aber für d Bevölkerig.

Musig

Jetze sy alli Stückli zwöistimmig u i der richtige Tonart gschribe. Wär se wott bruche – nume drahi! Vil Vergnüege!