Persönlechs

Uf dere Syte sött i älwä schrybe, das i nünzähhundertfüfefüfzg im Simetal gebore bi.
Aber über ds Alter redt me ja nid. U wen i schrybe, das i Spängler-Installateur glehrt ha, stimmt das zwar. Es isch aber äbeso Gschicht, wie my zwänzgjähregi Tägigkeit bi der Füürwehr Interlake, won ig zum Material gluegt u zum Schluss du o no d Lüt kommandiert ha. U ds „gsy“ bim Kommandant vo der Zivilschutzorganisation Jungfrou zeigt nume, dass i jetze o da derdür bi u drum voller Elan i dritt Lebensabschnitt gstartet bi.
D Information, dass my Frou un ig zäme füf Chind u schon e raglete Grosschind hei, wo üs uf Trab halte, geit ghörig i ds Private yne.
Dass i Bärndütsch schrybe heit dir ja scho gmerkt. Dass i das scho lang mache, interessiert öich wahrschynlech äbesowenig, wie das, dass i näbscht em Hobby Schrybe no öppe einisch chli musiziere u bi der Musiggsellschaft Matte mit schwingender Fahne probiere die marschmusikalische Evolutione mitzträppele. Velofahre u Nordic Walke tät i o no – aber äbe nume denn, we ds Wätter stimmt un i nid grad z fule bi derzue …

So gseh gits äbe nüt vo bsunderer Wichtigkeit, won i under „Persönlechs“ müesst schrybe.
Drum lan igs bi däm da obe la bewände u dänke, dass dir öich de scho wärdet mälde, we dir Gnauers weit wüsse.